Vaksineringa i gang


Sjukepleiarstudent Johanna Nordbø var fyrst i køen då dørene opna for vaksinering mot svineinfluensa i dag.

Som tidlegare annonsert, legg Stavanger kommune og UiS til rette for vaksinering på Campus Ullandhaug i dag og i morgon. Både tilsette og studentar kan nytte tilbodet.

Johanna Nordbø, Rebekka Pettersen og Maren Melhus var blant dei aller fyrste som fant vegen til Tjodhallen i ettermiddag. I likskap med fleire av vaksinatørane, tek dei andre året av bachelor-studiet i sjukepleie.

Vil ikkje ha influensa
– No skal vi snart ut i praksis, og då har eg ikkje lyst til å bli smitta eller sjølv smitte nokon andre. Eg vil heller ikkje ta sjansen på å gå glipp av praksisperioden på grunn av influensa, seier Nordbø.

Hennes to medstudentar, Rebekka Pettersen og Maren Melhus, er nøgde med både tidspunkt og sted for vaksineringa.

– Det er veldig bra at vi kan få vaksinen her kor vi er, meiner Melhus.

Passar no
– Før jul var eg oppteken med eksamenar, og eg fekk heller ikkje tatt vaksinen i romjula. Difor er det fint å ta den no, seier Pettersen.

Vaksineringa fortset tirsdag mellom klokka 10 og 15. Tilsette og studentar kan ta med seg personnummer til Tjodhallen og bli vaksinert. Det kostar 150 kroner.

 


Sist oppdatert av Leiv Gunnar Lie (18.01.2010)

Skriv ut artikkel print symbol